Hoke beghar ja rahe the regzaaron men kaheen.

Hoke beghar ja rahe the regzaaron men kaheen.
Main bhi tha un kaarvaanon kii qataaron men kaheen.
Vo to kahiye saath uska tha ke saahil mil gaya,
Kashtiyaan bachti hain aise tez dhaaron men kaheen.
Der tak main aasamaan ko ek tak taktaa raha,
Sochkar shaayad vo shaamil ho sitaaron men kaheen.
Uspe jo bhi guzre, vo har haal men rahta hai khush,
Uske jaise log bhi hain in dayaaron men kaheen.
Ye bhi mumkin hai vo aaya ho ayaadat ke liye,
Kya ajab shaamil ho vo bhi gham-gusaaron men kaheen.
Ghar se jab niklaa bazaahir vo bahot khush-haal tha,
Lautne par khud ko chhod aaya ghubaaron men kaheen.

***************************